ABACA FIESTA ng BCARRD at PCAARRD sa Legazpi Patok sa mga Bicolano


Legazpi City, Albay- PATOK sa mga Bicolano ang paraan ng pagpo promote ng Bicol Consortium on Agriculture Resources Research and Development (BCARRD) kabalikat ang Philippine Council for Agriculture Aquatic and natural Resources Research and Development ng Department of Science and Technology (PCAARRD-DOST) sa abaca at mga produktong nakukuha mula sa halamang ito.

 

Sa pamamagitan ng kanilang programang kung tawagin ay FIESTA, na ang ibig sabihin ay Farms and Industries Encounters through Science and Technology in Agriculture napag iibayo ng nasabing programa ang kalidad ng produktong agricultural sa pamamagitan ng paglapat ng agham at teknolohiya kaakibat ang maayos at tamang packaging at promosyon upang ang payak na produktong agricultural ay maging world class.

 

Bukod sa ginanap na fashion show ng mga bags at telang likha mula sa abaca ay makikita rin ang mga likhang habi na ginagawang customized carpets, yari ng telang pang barong at saya, mga bags at accessories, lubid, furniture at kabaong na binibili ng mga taga Canada at England ayon sa isang entreprenyur buhat sa Camalig, Albay. Bukod sa Legazpi City, Tabako, Daraga at Camalig, may mga tanim rin ng abaca sa ilang bahagi ng Kabikulan lalo sa Catanduanes.

 

Dahil marami ring tanim na abaca sa Leyte at Samar, pati Palawan, kabilang rin ang nasabing mga lugar na minamatahang isa ayos upang patuloy na mapakinabangan ng tao ang biyaya ng abaca. Nabatid na ginagamit na rin ang halamang kamag anak ng saging na ito sa mga matitibay na bagay pang konstrukyon gaya ng hamba, pader, roofing at pinto. Bukod sa PCAARRD may ilang ahensya rin sa ilalim ng DOST na may mga pag aaral ukol sa mahalagang silbi ng abaca gaya ng Philippine Textile Research Institute (PTRI). Ayon sa ilang residente ng camalig na aming nakapanayam, dahil kamag anak ng saging ang abaca at ang sukat ng bunga ay halos kasing liit lang ng senyorita, sinasabi bagaman tinututulan ay kinakain rin umano ito at ang lasa ay gaya ng sa saging na saba. (mike balaguer)