Philippine Health Insurance Corporation

PGH TUMANGGAP NG PHP 22.8 MILYON MULA SA PHILHEALTH

Tumanggap kamakailan ang Philippine General Hospital (PGH) ng mahigit Php 22.8 milyon mula sa Philippine Health Insurance Corporation (PhilHealth) bilang reimbursement sa paunang 77 claims sa mga pasyenteng na-confine dahil sa atake sa puso o Ischemic Heart Disease – Acute Myocardial Infarction (IHD-AMI).

Ang pinagbuting pakete para sa atake sa puso ay itinaas ng PhilHealth sa P523,853 mula sa dating P30,300 simula Disyembre 21, 2024.

Ayon kay PGH Medical Director Dr. Gerardo D. Legaspi, wala ng charity sa heart attack patient sa PGH dahil sa malaking pagbabago (sa benepisyo ng PhilHealth).  “Iyan ang improvement na gusto nating makita. And I think with this current administration of PhilHealth, we will be seeing more of that”, dagdag pa ni Dr. Legaspi.

Nagpasalamat naman si Juvy B. Busayong, asawa ng pasyenteng si Jose Busayong mula sa Calamba City, Laguna sa PhilHealth at sa PGH.  Sinabi nya na sa una ay nangangamba sila dahil sa laki ng gastos ng marinig nila na kailangan ng angiogram ng kanyang asawa pero laking tuwa nila noong sinabi ng doktor na may package ang PhilHealth at wala na silang babayaran.  “Napakalaking pribilehiyo na kami ay makatanggap ng ganoong package. Gusto naming magpasalamat sa PhilHealth sa package na ibinigay dito sa amin. Sana po ay marami pa kayong matulungan at marami pang buhay ang ma-save”, wika ni Busayong.

Samantala, tiniyak ni Dr. Mercado ang pangako ng PhilHealth sa mabilis na pagbabayad ng mga claim sa mas maraming ospital.

“Ang P22.8 milyong bayad na ito sa PGH ay simula pa lamang. Kami ay iikot pa sa iba’t ibang mga rehiyon para ating personal na tiyakin ang mabilis na pagpoproseso at pagbabayad ng claims para sa mga serbisyong ipinagkaloob ng ating mga ospital sa mga miyembrong may sakit sa puso,” wika ni Dr. Mercado.

Para sa detalye para sa mga benepisyo ng PhilHealth, maaaring tumawag sa 24/7 touch points: (02) 866-225-88; mobile numbers 0998-857-2957, 0968-865-4670, 0917-1275987 or 0917-1109812. ###      

DIREKTIBA NI PBBM PARA SA TULOY-TULOY NA SERBISYO; PHILHEALTH, TINANGGAL NA ANG 45-DAY BENEFIT LIMIT

Muling pinatunayan ni PhilHealth Acting President and CEO Dr. Edwin M. Mercado na isakatuparan ang utos ni Pangulong Ferdinand R. Marcos Jr. na tiyaking “tuloy-tuloy ang serbisyo ng PhilHealth” sa pagtanggal ng polisiya nitong 45-day benefit limit.

“Ang 45-day limit sa paggamit ng benepisyo ay lumang estratehiya sa pagkontrol ng gastos. Ngunit sa pagbabago ng ating payment mechanism, napapanahon nang repormahin ito dahil hindi natin mahuhulaan kung kailan mangangailangan ng serbisyong medikal ang mga kababayan natin. Marami sa mga serbisyo ang kinakailangan higit sa 45 araw. Kaya naman nagpapasalamat tayo sa PhilHealth Board sa pag-apruba ng patakarang ito,” paliwanag ni Dr. Mercado.

Para sa detalye ng PhilHealth Circular 2025-0007, maaaring tumawag ang miyembro sa PhilHealth’s 24/7 touch points sa (02) 866-225-88 o sa mobile numbers (Smart) 0998-857-2957, 0968-865-4670, (Globe) 0917-1275987 or 0917-1109812. Maaari din itong i-download sa www.philhealth.gov.ph.

MALAKING TAGUMPAY PARA SA MGA PASYENTENG NAGPAPA-DIALYSIS:  BENEPISYO SA PERITONEAL DIALYSIS AABOT NA SA P1.2M

January 27, 2025 l Press Release 2025-02

Alinsunod sa deklarasyon ni Pangulong Ferdinand R. Marcos, Jr. na patuloy na palalawakin pa ang mga benepisyo sa kalusugan kahit walang subsidiya mula sa gobyerno, itinaas kamakailan ng Philippine Health Insurance Corporation (PhilHealth) ang Z Benefit Package nito para sa Peritoneal Dialysis simula Enero 1, 2025.  Ang benepisyo ay mayroon nang hiwalay na mga pakete para sa mga matatanda at mga bata. 

Ayon sa National Kidney and Transplant Institute, ang peritoneal dialysis (PD) ay isang uri ng dialysis kung saan ang sariling peritoneal membrane ng pasyente o lining ng mga abdominal organs at body surfaces sa loob ng abdominal cavity ay ginagamit bilang artipisyal na mga bato o kidney.

Ang pinahusay na PD package ay sumasakop sa iba’t-ibang modalities ng RRT batay sa edad. Para sa mga adults o matatanda, sagot ng PhilHealth ang Continuous Ambulatory Peritoneal Dialysis (CAPD), at CAPD at Automated Peritoneal Dialysis (APD) para naman sa mga mas batang pasyente.

“Nais naming hikayatin ang paggamit ng peritoneal dialysis para sa pasyente na may Chronic Kidney Disease Stage 5,” sabi ni PhilHealth President at CEO Emmanuel R. Ledesma, Jr. “Ang PD ay isang mabisang opsyon bukod sa hemodialysis, hindi lamang upang bigyan ng awtonomiya at kakayahang pumili ang aming mga miyembro sa modality ng paggamot, kundi upang tiyakin ang kalidad ng buhay at malayang paggalaw ng mga pasyente,” dagdag niya.

Para sa mga matatandang pasyente, ang coverage ay P389,640 o P510,140, depende sa mga PD solutions na kailangan ng pasyente bawat araw. Ang package ay dating nasa P270K bawat taon.

Samantala, ang mga benepisyo para sa mga batang pasyente sa ilalim ng CAPD ay mula P510K hanggang P765,210, habang ang coverage para sa APD ay mula P763K hanggang P1.2 milyon. Sinasagot din ng PhilHealth ang exit site infection at peritonitis prevention care pati na rin ang ancillary services gaya ng catheter insertion, outpatient treatment ng PD-related peritonitis at laboratory, diagnostic tests, at mga gamot para sa parehong adult at pediatric cases.

Ayon sa PhilHealth Circular No. 2024-0036, ang mga pasyente na may Chronic Kidney Disease Stage 5 na gagamit ng ganitong uri ng RRT ay kailangang magparehistro muna sa PhilHealth Dialysis Database at sumunod sa umiiral na mga patnubay sa pagiging miyembro. Ang mga pasyente ay dapat ding sumunod sa treatment plan, kabilang ang mga follow-up visits. Mahigpit na ipinagbabawal ang pagbebenta o pamamahagi ng mga PD solutions na ibinigay sa kanila.

Bukod dito, ang mga contracted providers o health facilities ay ipinagbabawal na maningil ng dagdag na singilin para sa mga essential health services. Gayunpaman, maaari silang maningil para sa mga serbisyo at amenities na hindi kasama sa listahan ng essential health services na saklaw ng package. Dapat nilang ipaliwanag sa mga pasyente ang anumang co-payment na sisingilin pa sa kanila.

Ang pinahusay na PD Z Benefits ay makukuha sa alinman sa 51 contracted PD providers sa buong bansa, ang listahan nito ay makikita sa www.philhealth.gov.ph. Ang mga miyembro ay maaari ring humingi ng karagdagang impormasyon at tulong sa pamamagitan ng pagtawag sa mga sumusunod na 24/7 touch points: (02) 866-225-88 o sa mga mobile numbers 0998-857-2957, 0968-865-4670, 0917-1275987 o 0917-1109812.###

MAS MATAAS NA BENEPISYO PARA SA OPERASYON SA KATARATA, EPEKTIBO NA

Simula Enero 30, 2025, ipinatupad ng Philippine Health Insurance Corporation (PhilHealth) ang pinalawak nitong benepisyo para sa operasyon sa katarata kasama ang paglalagay ng intraocular lens (IOL) para sa matatanda at bata.

Ito ay sang-ayon sa direktiba ni Pangulong Ferdinand R. Marcos, Jr. na palawakin pa ang mga serbisyong pangkalusugan ng PhilHealth.

Batay sa PhilHealth Circular 2025-0001 na inilathala noong Enero 15, 2025, ang benepisyo para sa operasyon sa katarata sa mga matatanda ay tumaas nang higit sa apat na beses at nagsisimula sa P20,200. Ang benepisyo ay depende sa uri ng lens na ginamit, kung saan ang mga operasyon na gagamitan ng monofocal IOL o standard lens ay may halagang P28,300 bawat mata.  Ang mga premium lens naman tulad ng monofocal toric IOL na nagbibigay ng malinaw na paningin sa isang partikular na distansya habang inaayos ang astigmatism ay sasagutin sa halagang P43,800 bawat mata. Samantala, ang multifocal IOL na tumutulong makakita ng malinaw sa malapit at malayo ay may halagang P66,900 bawat mata, habang ang multifocal toric IOL na nag-aayos ng astigmatism at nagbibigay ng malinaw na paningin sa iba’t ibang distansya ay sagot sa halagang P80,900 para sa kanang mata.

Samantala, ang coverage para sa operasyon ng katarata sa mga bata ay umaabot ng hanggang P135,000 bawat mata at P139,050 para sa parehong mata. Kung kasama ang intraocular lens (IOL), ang coverage ay nasa P179,000 bawat mata at P187,100 para sa parehong mata. Dating nagbabayad ang ahensya ng P16,000 bawat mata para sa pagtanggal ng katarata sa matatanda at bata.

Nananawagan ang ahensya sa mga accredited healthcare facilities na panatilihing may sapat na supply ng Intraocular lenses, gamot sa mata, IV fluids, at iba pang mga kagamitan upang masigurong hindi na kailangang gumastos ng pasyente sa pagbili ng gamot sa labas ng pasilidad.

Sa buong 2024, ang PhilHealth ay nakapagbayad ng kabuuang P3.58 bilyon para sa 224,209 operasyon sa katarata.###February 18, 2025

Pahayag ng PhilHealth sa Akusasyong Labis na Budget para sa Christmas Party

Ito ay paglilinaw sa malisyosong akusasyon ni Dr. Tony Leachon sa kanyang social media account tungkol sa diumano’y labis na budget ng PhilHealth para sa Christmas party.

Nais naming linawin na ang PhilHealth ay lubos na sumusunod sa direktiba ng Malacañang na gawing simple ang selebrasyon ng ahensya ngayong Pasko. Katunayan ay naglabas kami ng Management Advisory No. 2024-003 “Panawagan para sa simpleng pagdiriwang ng Pasko,” noong Nobyembre 25, 2024 na nag-utos sa lahat ng tanggapan kabilang ang mga regional office na magtipid sa pagsasagawa ng naturang aktibidad. Kinansela ang ilang aktibidad at ang maiipong pondo ay ido-donate sa mga naapektuhan ng mga bagyo kamakailan.

Ang listahan sa post ni Dr. Leachon ay hindi pa pinal, at ang mga ito ay para sa pagdiriwang ng ika-30 anibersaryo ng PhilHealth sa 2025 na isang milestone year. Sa temang “Panatag Kami Dito!”, ang mga aktibidad ay bilang paggunita din sa National Health Insurance Month ayon sa Proclamation 1400. Ang mga aktibidad na ito ay pambuong taon at pambansa ang saklaw, at lalahukan ng mga empleyado, stakeholders, champions at advocates, at higit sa lahat ng mga miyembro.

Ang mga inaprubahang aktibidad ay makatwiran, binudgetan kasunod ng mga umiiral na limitasyon na itinakda ng Gobyerno, at bibilhin alinsunod sa RA 9184. Ang mga aktibidad na ito ay naglalayong magkaroon ng makabuluhang pagdiriwang ng milestone year na ito, at gagamitin upang lalo pang hikayatin ang mga miyembro at stakeholders na palakasin ang interes at kamalayan sa maraming repormang ginagawa ng PhilHealth gaya ng pagpapahusay ng mga benepisyo ayon sa Universal Health Care law.

Pinapaalalahanan namin si Dr. Leachon na maging mas responsable at maingat bago maglabas ng anumang pahayag na maaaring makalito at magbunga ng hindi tamang pang-unawa mula sa publiko.

Aming tinitiyak sa publiko na nakatuon ang PhilHealth sa maingat ta masinop na  pangangasiwa ng pondo ng mga miyembro. ###

 PhilHealth nagbayad ng P137 bilyon sa loob ng 10 buwan

Nagbayad ang PhilHealth ng kabuuang P137.6 bilyon sa mahigit 12,000 accredited health care facilities nito sa buong bansa mula Enero 1 hanggang Oktubre 31, 2024 sa bilis na 25 araw.

Ang nasabing bayad ay P37.6 bilyon o 37.7 porsiyentong mas mataas kumpara sa P99.9 bilyon sa kaparehong panahon noong nakaraang taon. Samantala, ang 25 araw processing time ay 35 araw mas mabilis kumpara sa 60 araw na itinakda sa Republic Act No. 10606.

“Ang tuloy-tuloy na pagbabayad at mabilis na pagproseso ng claims ay bahagi ng aming pangako ng mahusay na suporta sa aming health care partners. Malaking tulong ito para mapanatili ang suplay ng mga gamot, mapasahod ang mga health worker, at patuloy na mapagbuti ang mga pasilidad,” paliwanag ni PhilHealth President at CEO Emmanuel R. Ledesma, Jr.

Kinilala naman ng mga malalaking organisasyon gaya ng Philippine Hospital Association (PHA) at Private Hospital Association of the Philippines, Inc. (PHAPi) ang pagbabagong ito sa PhilHeealth. Ayon kay PHA President Dr. Jose P. Santiago, Jr., “Marami nang pagbabago sa mga
nakaraang buwan tungkol sa pagbabayad ng PhilHealth sa mga ospital. Personal silang bumibisita sa mga ospital sa ibat-ibang rehiyon para mag-reconcile at alamin ang mga problema. Dahil dito, nababawasan na ang negatibong issues at nagkakaroon kami ng magandang relasyon. Ramdam na namin ang pagbabago.”

“Sa nakalipas na ilang buwan, nakita namin ang makabuluhang pagbuti sa pagproseso ng claims. Pinatutunayan at kinikilala ng mga ospital ang positibong pagbabagong ito,” pahayag naman ni PHAPi President Dr. Jose Rene De Grano sa inisyatibong ito ng ahensiya.  

Kasalukuyang tinitingnan ng PhilHealth ang posibilidad na gamitin ang Artificial Intelligence (AI) para lalong pabilisin pa ang pagproseso ng claims. Ayon kay Ledesma, katatapos lang ng kanilang pag-aaral sa posibleng maitutulong ng AI sa bahaging ito ng kanilang operasyon. “Naniniwala kami na sa suporta ng aming mga healthcare partner, ito ay malapit ng maganap,”.

Umapela din ang hepe ng PhilHealth sa mga pasilidad  na mamuhunan sa kanilang mga empleyado para matiyak na mabawasan ang sinasauli o dine-deny na claims. “Mahalaga na kumpleto at maayos ang claim na isinusumite sa PhilHealth para maiwasan ang bumabalik na claims dahil sa kakulangan sa dokumento o pagkakaiba sa mga entry; hindi kumpleto, hindi pare-pareho o hindi
nababasa ang mga dokumento, at hindi maayos o nakumpletong mga claims form”.

Hindi naman binabayaran ang mga claim dahil sa late filing/re-filing, hindi sakop na mga kaso, at confinement ng pasyente habang may isyu sa accreditation ng ospital.

“Responsibilidad namin na suriing mabuti ang bawat claim dahil itinakda ito ng batas para tiyakin na ang pondong ipinagkatiwala sa amin ng mga miyembro ay nagagastos nang maingat,” diin ni Ledesma.

Upang mabawasan ang insidente ng returned o denied na mga claim, nakikipag-ugnayan ang PhilHealth sa mga ospital sa buong bansa upang ipaalam ang mga bagong
patakaran sa tamang pagproseso ng claims. Nagsasagawa din sila ng claims reconciliation.

“Patuloy ang pagsisikap ng PhilHealth na maipaalam sa ospital ang status ng kanilang claims. Naniniwala kaming ilalagay nito sa tamang perspektibo ang isyu ng
diumano’y hindi namin pagbabayad. Ang PhilHealth ay pinamamahalaan ng mga batas at mga tuntunin ng state auditing upang matiyak na ang bawat piso ay ginagastos
nang maingat at transparent,” giit ng PhilHealth Chief.