KWF

KOMISYON SA WIKANG FILIPINO

𝑹𝒆𝒙𝒐𝒏 𝑯𝒐𝒓𝒂 𝑮𝒂𝒔𝒕𝒐𝒏, 𝑯𝒊𝒏𝒊𝒓𝒂𝒏𝒈 𝒏𝒈 𝑲𝑾𝑭 𝒏𝒂 𝑴𝒂𝒏𝒂𝒏𝒂𝒚𝒔𝒂𝒚 𝒏𝒈 𝑻𝒂𝒐𝒏 𝟐𝟎𝟐𝟔!

Gagawaran ng Komisyon sa Wikang Filipino (KWF) si Rexon Hora Gaston ng KWF Mananaysay ng Taon 2026 pára sa kaniyang sanaysay na: “Ang Paglimot sa Panahon ng Pag-alala: Paniyaw, Ngilin, at Bain sa Panahon ng Artificial Intelligence.” Makatatanggap siyá ng PHP30,000.00 (net), plake, at medalya.

Nagwagi naman si Emersan D. Baldemar ng Ikalawang Gantimpala pára sa kaniyang sanaysay na “Mebuayaan at Kadatngan: Ang Paradalumat ng Hinuha Bílang Lohos-Matris ng Artificial Intelligence at Balatuwas sa Kapwadunong, Nakem, at Kapantayang Epistemiko ng Wikang Filipino.” Makatatanggap siyá ng PHP20,000.00 (net) at plake.

Nanalo rin si Mark Anthony S. Angeles ng Ikatlong Gantimpala sa kaniyang sanaysay na “Artipisyál ma’y Nakikipagkápuwâ: Artificial Intelligence at ang Buháy na Wikà’t Dánas ng Filipíno.” Makatatanggap siyá ng PHP15,000.00 (net) at plake.

Si Rexon H. Gaston ay kasalukuyang Assistant Professor sa Kalinga State University na nagtuturo ng mga asignaturang Kontekstuwalisadong Komunikasyon sa Filipino, Art Appreciation, The Life and Works of Rizal, Indigenous Knowledge Systems and Practices (IKSP), at Language and Literature. Nagwagi rin siya ng “Most Creative Short Story of the Year” sa Instabright Third National Literary Award noong 2024. Nagsusulong siya ng pagpapalaganap ng wikang Filipino, ISKP, ingklusibong edukasyon, at mga pedagohiyang pangkultura.

Ang Sanaysay ng Taon ay taunang patimpalak ng KWF na naglalayong himukin ang mga natatanging mananaysay ng bansa, na ilahok ang kanilang mga sanaysay. Ang paksâ ngayong taon ay tungkol sa tema ng Buwan ng Wikang Pambansa 2026 na “Wikang Filipino at AI: Kasangkapan sa Pananaliksik at Tulay sa Yaman ng Impormasyon.”

Ang Bunyi: KWF Gabi ng Parangal 2026 ay gaganapin sa 27 Agosto 2026.

𝑲𝒂𝒕𝒂𝒂𝒔-𝒕𝒂𝒂𝒔𝒂𝒏𝒈 𝑯𝒖𝒌𝒖𝒎𝒂𝒏 𝒏𝒈 𝑷𝒊𝒍𝒊𝒑𝒊𝒏𝒂𝒔, 𝑮𝒂𝒈𝒂𝒘𝒂𝒓𝒂𝒏 𝒏𝒈 𝑲𝑾𝑭 𝑫𝒂𝒏𝒈𝒂𝒍 𝒏𝒈 𝑾𝒊𝒌𝒂 𝟐𝟎𝟐𝟔

Gagawaran ang Kataas-taasang Hukuman ng Pilipinas ng KWF Dangal ng Wika 2026 sa Kategoryang Samahan/Institusyon ngayong pagdiriwang ng Buwan ng Wikang Pambansa 2026.

Ang Kataas-taasang Hukuman ng Pilipinas ay nanguna sa paggamit ng sariling wika sa mga kapasiyahang nagmumulat sa kamalayang bayan, mga usaping panghukuman, mga katawagang legal, mga pahayag sa publiko, at mga diskursong pangkatarungan, at matagumpay nitong nailapit ang wika ng batas sa sambayanang Pilipino.

Ang Gawad Dangal ng Wika ang pinakamataas na pagkilála sa mga indibidwal, samahán, tanggápan, institusyon, o ahensiyang pampamahalaán o pribadong sektor na may natatanging ambag o nagawa túngo sa pagsusulong, pagpapalaganap, pagpapayabong, at preserbasyon ng wikang Filipino at/o iba pang wika sa Pilipinas. Ang gagawaran ay makatatanggap ng tropeo, plake, at medalya.

Ang KWF Gabi ng Parangal 2026 ay gaganapin sa 27 Agosto 2026.

𝐒𝐊 𝐓𝐚𝐠𝐚𝐩𝐚𝐧𝐠𝐮𝐥𝐨 𝐍𝐚𝐭𝐡𝐚𝐜𝐢𝐚 𝐙𝐢𝐞𝐫𝐫𝐚 𝐄. 𝐄𝐫𝐞𝐬𝐞, 𝐓𝐚𝐭𝐚𝐧𝐠𝐠𝐚𝐩 𝐧𝐠 𝐊𝐖𝐅 𝐆𝐚𝐰𝐚𝐝 𝐂𝐚𝐫𝐥𝐨𝐬 𝐏𝐚𝐝𝐢𝐥𝐥𝐚 𝟐𝟎𝟐𝟔

Tatanggap si Kgg. Nathacia Zierra E. Erese ng KWF Gawad Carlos Padilla 2026 ngayong pagdiriwang ng Buwan ng Wikang Pambansa 2026.

Si Kgg. Nathacia Zierra E. Erese ay ang Tagapangulo ng Sangguniang Kabataan ng Brgy. Osmeña ng Solano, Nueva Vizcaya. Kaniyang pinangunahan ang pagpapatibay ng mga ordinansang nagtataguyod sa mga programa, komunikasyon, at mga dokumento ng Sangguniang Kabataan ng Barangay Osmeña, gayundin sa taunang pagdiriwang ng Buwan ng Wikang Pambansa, na nagbigay ng higit na sigla at saysay sa pagpapayabong ng kamalayang pangwika at pangkultura sa hanay ng kabataan at buong pamayanan.

Ang Gawad Carlos Padilla ay mataas na pagkilála sa mga mambabatas na may natatanging ambag o nagawa túngo sa pagsusulong, pagpapalaganap, pagpapayabong, at preserbasyon ng wikang Filipino. Ang gagawaran ay makatatanggap ng busto, plake, at medalya.

Ang KWF Gabi ng Parangal 2026 ay gaganapin sa 27 Agosto 2026

𝐏𝐚𝐠𝐛𝐮𝐨 𝐬𝐚 𝐎𝐫𝐭𝐨𝐠𝐫𝐚𝐩𝐢𝐲𝐚𝐧𝐠 𝐌ë𝐧𝐮𝐛ù 𝐃𝐮𝐥á𝐧𝐠𝐚𝐧, 𝐈𝐬𝐢𝐧𝐚𝐠𝐚𝐰𝐚 𝐧𝐠 𝐊𝐖𝐅 𝐬𝐚 𝐋𝐮𝐧𝐠𝐬𝐨𝐝 𝐊𝐨𝐫𝐨𝐧𝐚𝐝𝐚𝐥

Nagsagawa ng Palíhan sa Pagbuo ng Ortograpiya ng wikang Mënubù Dulángan ang Komisyon sa Wikang Filipino (KWF) noong 6–8 Agosto 2026 sa Paraiso Verde Hotel, Lungsod Koronadal.

Ang mga gawain ay pinangunahan ng mga mananaliksik ng KWF na sina Dr. Jose Evie  G. Duclay, Rolien Mark M. Balisi, at Christian DS. Nayles; SWK ng University of Southern Mindanao (USM); mga gurong manunulat mula sa DepEd Sultan Kudarat, at mga elder ng komunidad ng Mënubù Dulángan mula sa pitong (7) bayan ng Sultan Kudarat.

Naging katuwang ng KWF sa pananaliksik na ito ang mga kinatawan mula sa Sentro ng Wika at Kultura (SWK) ng USM para matiyak ang maayos na implementasyon ng mga gawain at mapalakas ang ugnayan ng dalawang institusyon sa mga proyektong pangwika.

Sa unang araw ng palihan, tinalakay ni Dr. Jose Evie G. Duclay ang introduksiyon sa proyekto ng KWF na pagbuo ng ortograpiya, kabilang ang henetikong ugnayan ng mga wika sa Pilipinas. Ipinakilala naman ng mananaliksik na si G. Rolien Mark M. Balisi ang International Phonetic Alphabet (IPA) at ginabayan ang mga kalahok sa pagtuklas ng mga tunog na ginagamit sa wikang Mënubù Dulángan at mga prosesong morpoponemiko.

Sa ikalawang araw, pinangunahan naman ng mananaliksik na si G. Christian DS. Nayles ang pagsulat ng mga kabanata ng ortograpiya, kabilang ang pantig at pagpapantig, pagbaybay na pabigkas at pasulat, at paggamit ng mga tuldik at bantas.

Ang Pagbuo ng Ortograpiya ng mga Wika ng Pilipinas ay isang patuluyang programa ng KWF sa ilalim ng Sangay ng Lingguwistika, Publikasyon, at Promosyon (SLPP) na naglalayong paigtingin ang dokumentasyon, pagpapaunlad, at pagsusulong sa paggamit ng mga katutubong wika sa Pilipinas.

𝐓𝐚𝐠𝐚𝐩𝐚𝐧𝐠𝐮𝐥𝐨𝐧𝐠 𝐁𝐚𝐫𝐫𝐢𝐨𝐬-𝐓𝐚𝐫𝐚𝐧, 𝐍𝐚𝐠𝐩𝐚𝐡𝐚𝐲𝐚𝐠 𝐧𝐠 𝐌𝐞𝐧𝐬𝐚𝐡𝐞 𝐬𝐚 𝐀𝐫𝐚𝐰 𝐧𝐠 𝐊𝐀𝐃𝐈𝐏𝐀𝐍

Idinaos ang Araw ng KADIPAN (Kapisanan ng Diwa at Panitik) noong 25 Agosto 2026 sa Metro Manila College sa Novaliches, Lungsod Quezon, sa ilalim ng Kolehiyo ng Edukasyon, at naging panauhing tagapagsalita si Tagapangulong Atty. Marites A. Barrios-Taran.

Sa kaniyang mensahe, binigyang-diin niya ang kahalagahan ng pagdiriwang ng Buwan ng Wika, lalo na sa akademya. Aniya, mahalaga na patuloy na mahikayat ang mga mag-aaral at mamamayan na pahalagahan at mahalin ang wikang pambansa bilang salamin ng kanilang pagkakakilanlan. Ipinaliwanag din niya ang tema ng pagdiriwang ngayong taon.

Sa huli, ipinaalala ni Tagapangulong Barrios-Taran na sa patuloy na pag-unlad ng akademya, dapat ding umunlad ang wikang ginagamit upang magkaunawaan, magkaisa, at makapaglingkod sa bayan ang mga mag-aaral sa hinaharap.

Bukás-palad na tinanggap noóng 26 Nobyembre 2025, ni Tagapangulong Atty. Marites A. Barrios-Taran sa Komisyon sa Wikang Filipino (KWF) para sa isang makabuluhang púlong at diyalogo sina Dr. Edwin R. Mabilin at Dr. Lakandupil C. Garcia, na kapuwa kilalang propesor, manunulat, editor, tagasalin, tagapanayam at tagapagtaguyod ng kapakanang pangwika sa bansa.

Nakiisa sa naturang púlong sina Fultaym Komisyoner Dr. Carmelita C. Abdurahman na kumakatawan sa wikang Samar-Leyte at Dr. Benjamin M. Mendillo Jr na kinatawan ng wikang Ilokano.

𝐂𝐨𝐧𝐠. 𝐀𝐧𝐭𝐨𝐧𝐢𝐨 𝐋. 𝐓𝐢𝐧𝐢𝐨, 𝐆𝐚𝐠𝐚𝐰𝐚𝐫𝐚𝐧 𝐧𝐠 𝐊𝐖𝐅 𝐆𝐚𝐰𝐚𝐝 𝐂𝐚𝐫𝐥𝐨𝐬 𝐏𝐚𝐝𝐢𝐥𝐥𝐚 𝟐𝟎𝟐𝟔

Gagawaran si Kgg. Antonio L. Tinio ng KWF Gawad Carlos Padilla 2026 ngayong pagdiriwang ng Buwan ng Wikang Pambansa 2026.

Si Kgg. Antonio L. Tinio ay kasalukuyang kinatawan ng ACT Teachers Party-list sa Mababang Kapulungan ng Kongreso. Siya ang pangunahing may-akda sa Mababang Kapulungan ng Filipino Sign Language (FSL) Act (Batas Republika Blg. 11106), na nagbigay ng opisyal na pagkilala sa FSL bilang pambansang wikang senyas ng mga Binging Pilipino at nagpalawak sa paggamit nito sa edukasyon, serbisyong pampubliko, at komunikasyong ingklusibo; gayundin sa kaniyang patuloy na pagsusulong ng mga panukalang nagpapatibay sa paggamit ng wikang Filipino at mga katutubong wika sa sistema ng edukasyon at sa mga institusyong pampubliko.

Ang Gawad Carlos Padilla ay mataas na pagkilála sa mga mambabatas na may natatanging ambag o nagawa túngo sa pagsusulong, pagpapalaganap, pagpapayabong, at preserbasyon ng wikang Filipino. Ang gagawaran ay makatatanggap ng busto, plake, at medalya.

Ang KWF Gabi ng Parangal 2026 ay gaganapin sa 27 Agosto 2026.

-30-

𝐒𝐊 𝐓𝐚𝐠𝐚𝐩𝐚𝐧𝐠𝐮𝐥𝐨 𝐍𝐚𝐭𝐡𝐚𝐜𝐢𝐚 𝐙𝐢𝐞𝐫𝐫𝐚 𝐄. 𝐄𝐫𝐞𝐬𝐞, 𝐓𝐚𝐭𝐚𝐧𝐠𝐠𝐚𝐩 𝐧𝐠 𝐊𝐖𝐅 𝐆𝐚𝐰𝐚𝐝 𝐂𝐚𝐫𝐥𝐨𝐬 𝐏𝐚𝐝𝐢𝐥𝐥𝐚 𝟐𝟎𝟐𝟔

Tatanggap si Kgg. Nathacia Zierra E. Erese ng KWF Gawad Carlos Padilla 2026 ngayong pagdiriwang ng Buwan ng Wikang Pambansa 2026.

Si Kgg. Nathacia Zierra E. Erese ay ang Tagapangulo ng Sangguniang Kabataan ng Brgy. Osmeña ng Solano, Nueva Vizcaya. Kaniyang pinangunahan ang pagpapatibay ng mga ordinansang nagtataguyod sa mga programa, komunikasyon, at mga dokumento ng Sangguniang Kabataan ng Barangay Osmeña, gayundin sa taunang pagdiriwang ng Buwan ng Wikang Pambansa, na nagbigay ng higit na sigla at saysay sa pagpapayabong ng kamalayang pangwika at pangkultura sa hanay ng kabataan at buong pamayanan.

Ang Gawad Carlos Padilla ay mataas na pagkilála sa mga mambabatas na may natatanging ambag o nagawa túngo sa pagsusulong, pagpapalaganap, pagpapayabong, at preserbasyon ng wikang Filipino. Ang gagawaran ay makatatanggap ng busto, plake, at medalya.

Ang KWF Gabi ng Parangal 2026 ay gaganapin sa 27 Agosto 2026

-30-

𝐏𝐚𝐧𝐠𝐚𝐧𝐠𝐚𝐥𝐚𝐩 𝐧𝐠 𝐃𝐚𝐭𝐨𝐬 𝐬𝐚 𝐆𝐥𝐨𝐬𝐚𝐫𝐲𝐨𝐧𝐠 𝐏𝐚𝐧𝐠𝐡𝐚𝐧𝐚𝐩𝐛𝐮𝐡𝐚𝐲

Isinagawa noong 3 Hunyo 2026 ang pangangalap ng datos para sa Glosaryong Panghanapbuhay sa Pagpapalayok at Pagpaparol sa Brgy. Gatbuca, Calumpit, Bulacan at ang gawaing ito ay bahagi ng proyektong Diksiyonaryo bílang pagpapalawak ng bokabularyong panteknolohiya at panghanapbuhay.

Kabilang sa mga ininterbiyu sina Carmelita F. Baluyot, hulíng magpapalayok sa lugar; Milagros Ramos-Lugto, magpapalayok at may-ari ng Milabel Pottery; at Juanito Mallari Sr., magpapasô, mulâ sa Brgy. Gatbuca, Calumpit, Bulacan; pati si G. Rolando S. Quiambao na tinaguriang Parol King ng San Fernando, Pampanga.

Layunin ng gawain na magtipon ng mga terminong panghanapbuhay na nakatuon sa pagpapalayok at pagpaparol sa mga pangunahing lugar na isinasagawa ito, kabilang ang Bulacan at Pampanga. Ang mga terminong malilikom at maidokumento ay gagamiting panimulang glosaryo para sa higit pang pagpapalawak ng pananaliksik sa wika at kultura.

Pinangunahan ng KWF ang gawain, sa ilalim ng Sangay ng Leksikograpiya at Korpus ng Pilipinas kasama sina Jennifer Bactol, Mae Ann Cansino, Earvin Christian Pelagio, at Julius Pontillas. Katuwang sa gawaing ito sina Dr. Mary S. Bulaong, Direktor ng Sentro ng Wika at Kultura, at G. Manolito G. Mata ng Bulacan State University, Kgg. Levi Peralta-Gallardo ng Brgy. Gatbuca, Prop. Roilingel P. Calilun, Direktor ng Sentro ng Wika at Kultura ng Pampanga State University, at LGU Tourism Office ng San Fernando, Pampanga.

𝐊𝐖𝐅 𝐀𝐤𝐭𝐢𝐛𝐨𝐧𝐠 𝐍𝐚𝐤𝐢𝐥𝐚𝐡𝐨𝐤 𝐬𝐚 𝐊-𝟏𝟎 𝐂𝐮𝐫𝐫𝐢𝐜𝐮𝐥𝐮𝐦 𝐈𝐦𝐩𝐥𝐞𝐦𝐞𝐧𝐭𝐞𝐫𝐬’ 𝐒𝐮𝐦𝐦𝐢𝐭

Aktibong dumalo ang Tagapangulo ng Komisyon sa Wikang Filipino (KWF) na si Atty. Marites A. Barrios-Taran, kasama ang Fultaym Komisyoner Benjamin M. Mendillo sa K-10 Curriculum Implementers’ Summit na isinagawa noóng 15 Enero 2026 sa Rizal Park Hotel, Manila. Layunin ng pagtitipon na pagtibayin, talakayin, at pag-ibayuhin ang pagpapatupad ng K-10 Kurikulum sa buong bansa.

Nagbigay ng mahalagang mensahe si Department of Education (DepEd) Secretary Sonny Angara at binigyang-diin nito ang papel ng mga tagapagpatupad ng kurikulum sa paghubog ng makabuluhan, ingklusibo, at makabansang edukasyon. Hinikayat niya ang mga guro, administrador, at katuwang na institusyon na magkaisa, makipagtulungan, at magsulong ng de-kalidad na sistema ng pagkatuto.

Nakiisa rin sa summit sina G. Gerson Marvin M. Abesamis, Director IV ng Bureau of Learning Delivery, Atty. Ester A. Funtalan, OIC, Office of the Director III ng BLD, at G. Jerome T. Buenviaje, Assistant Secretary ng Learning System Strand. Aktibo silang nagbahagi ng pananaw, naglatag ng mga polisiya, at nagpaliwanag ng mga estratehiya kaugnay ng epektibong implementasyon ng K-10 Kurikulum.

Ipinakita ng K-10 Curriculum Implementers’ Summit ang sama-samang pagkilos ng mga pinunὸ, eksperto, at institusyon upang paunlarin ang edukasyong Pilipino.

Ferdinand P. Jarin at Darwin P. Plaza, Wagî ng PHP100,000.00 sa KWF Gawad Julian Cruz Balmaseda 2026

NAGWAGI ng PHP100,000.00 sa Gawad Balmaseda 2026 ng Komisyon sa Wikang Filipino si Ferdinand P. Jarin, PhD para sa kaniyang disertasyon sa DLSU-Maynila na pinamagatang “Ang Kalyeng Walang Kamatayan: Ang Paglalandas ni Leoncio P. Deriada sa Panitikan ng Banwa at Bansa” bílang pinakamahusay na disertasyon sa taóng 2026.

Matagumpay niyang nailahad sa komprehensibong pamamaraan ang pagpapakilála ng kongkretisasyon at uswag ng panitikang rehiyonal. Tumuon ang pananaliksik na ito sa pag-iral ng panitikan ng Kanlurang Visayas sa kontemporaneong panahon. Pinatunayan niyang sa pamamagitan ng pagtatanghal ng ilang pilíng akda ni Leoncio P. Deriada, malinaw na maitatampok ang sensibilidad at konsepto ng pagkabansa. Patúloy nitóng hinahawan ang landas ng pagdurugtong at pag-aagapay ng panitikang rehiyonal at panitikang pambansa.

Samantála, nagwagi rin si Darwin P. Plaza ng PHP100,000.00 para sa kaniyang tesis masterado sa Ateneo De Naga University na pinamagatang “Gakot at Paglaban sa Kalamidad ng mga Taga-Partido Erya sa Bicol, Pilipinas” bílang pinakamahusay na tesis sa taóng 2026 ng Gawad Julian Cruz Balmaseda.

Nakatuon ang pag-aaral sa mga katutubong kaalaman sa paghahanda sa kalamidad ng mga malayò at tabing-dagat na komunidad sa Partido Erya, Bikol.

Matagumpay ang nagawang  dokumentasyon na nagpapakita ng isang malinaw na ambag sa pagpapanatili, pagpapaunlad, at pagpapahalaga ng anyo ng kultura at tradisyong sumasalamin sa pagkamalikhain at pagkamaugnayin ng mga taga-Partido sa kanilang lokal na kapaligiran.

Malinaw na napunuan niya ang kakulangan o kawalan ng mga pag-aaral tulad ng katutubong paggagakot bílang isang katutubong estratehiyang tumutugon sa panganib ng kapaligiran. Ang saliksik ay maituturing bílang isang akademikong sulatín, mahalagang ambag ang tesis na ito sa pagtuturò ng mga asignaturang Filipino, Kasaysayan at iba pang araling saklaw ang pagpapahalaga at pagkakakilanlan.

Ang Gawad Julian Cruz Balmaseda ay isang gawad para sa pinakamahuhusay na tesis at disertasyon na isinulat gámit ang wikang Filipino para sa mga larang akademiko, lalo na sa agham pangkalikasan, agham panlipunan, at matematika. Layunin ng gawad na ito na hikayatin at palaganapin, sa pamamagitan ng sistema ng mga insentibo ang pagsusulat at publikasyon ng mga akdang orihinal at ambag para sa intelektuwalisasyon at modernisasyon ng Filipino.

-30-